L'ISTRIAN E L'ACQUA MINERAL

Se xe una roba che l'istrian proprio no capiva, quela iera le fiasche de acqua mineral.
Fin de picio, ostrega, el saveva che in casa iera la spina e che iera una sai bela invension. Bastava verser la spina e vigniva fora acqua fresca, quanta che ti volevi. Certo, no de lassarla corer per vardarla, guai!
A casa iera la spina, a scola iera la spina, in piaza iera la fontanela, fora dela cesa anche. De sicuro no se pativa la sede.
Ma a un certo punto dela vita ste certesse, al'istrian, ghe xe vignude a mancar, ghe xe cascada la tera soto ai pie, ghe xe vignudi i dubi.
Va de novo dito che l'istrian iera andà a sposarse una foresta, sì, quela che vigniva de Trieste.
Ela la beveva esclusivamente acqua de botilia. In prima l'istrian iera incredulo, ma sempre acqua xe, el pensava. Cussì, con un poco de timor, lu continuava a impinirse el bicer soto la spina, ma za el dubio lo rodeva.
Ma, a parte el dubio, el colpo ghe iera vignù quando che la moje lo gaveva mandado a cior oto pachi de acqua, che vol dir setantado litri. Za butarli in tel carel robe che ghe ciapi la schena, e dopo chi paga dotor e medicine?
Ma xe quando che el xe rivà in cassa che robe che ghe la daghi. La comesa ghe fa el conto e ghe domanda quasi venti euri. "Venti euri?" ziga l'istrian, "ma la ga sbaià articolo, signorina, forsi la ga batudo 80 deca de coto!"
Dopodichè la comesa, con pasiensa che no ve digo, la ghe mostra el prezo de una botilia, e là l'istrian se arendi al'evidensa e, a malincuor, el paga, pensando che mile litri de acqua de spina ghe costava nianche due euri.
Dopo averse portà le botilie a casa, el pensa anca ala bensina 95 otani che el ga consumà, nonchè le gome del'auto e ala ulteriore fadiga de portarse i pachi in casa, e là el ga veramente risc'à le coronarie.
Mentre che in casa tuti continuava a svodar le fiasche che lui portava, e dopo ghe tocava, per de sora, a butar le fiasche in tela plastica, lui continuava a bever dela spina. Almeno qualcossa se sparagnava, ah!
Ma dopo i ga tacà a dirghe che cossa, che la sa de cloro, che cossa, che el xe sicuro che no xe la salmonela?
"Ostrega tua" pensava l'istrian, "ghe podessi eser piombo, cadmio, bismuto e uranio in quele botilie con l'analisi de tre ani prima stampada de sora. Almeno l'acquedoto fa l'analisi ogni giorno, no?"
E cussì, per no ingenerar scontenti, davanti ai altri beveva anca lu dela botilia, ma de sconto el continuava a sgionfarse de acqua de spina.
Fin che un giorno, a l'istrian, ghe xe vignuda l'idea. Bisogna saver che l'istrian gaveva fato scole alte al'estero, el andava a pie fin su al Volta, difati. E là i ghe insegnava dela clorasion del'acqua de rete, e che bastava lassarla là che el cloro andava via.
Un'idea diabolica se gaveva imposesà del'istrian. De note, impinida una mastela de acqua de spina, la fazeva riposar e dopo el impiniva le fiasche svode che el gavessi dovudo butar via. De giorno el fazeva finta de verzer el tapo co le portava in tola, perchè el tapo iera za verto e bisognava no farse becar.
Ogni tanto el diseva, aposta: "Che bona sta acqua mineral, no dovemo cambiar marca", e el bel xe che i altri ghe dava ragion.
Per de sora, col ga gaveva voia de farse un gireto, bastava che'l disi "Vado a cior acqua mineral che semo sensa!"
Ma la molje del'istrian a un certo punto se gaveva inacorto che le botilie de acqua iera scadude, epur l'istrian le gaveva apena comprade. Alora, senza dir niente, la svoda una fiasca, la ghe fa un segno de riconoscimento sul'eticheta, la la buta via e la vedi cossa sucedi.
No ocori che ve digo cossa che xe suceso quando l'istrian ga portà in tola la stessa fiasca impinida de novo, posso solo dirve che ala fine l'istrian ga pensà: "Ma va in remengo".
Va dito che la moje del'istrian no la iera mona: la vigniva infati de Trieste.

L'ISTRIAN E LA DOCIA

L'istrian gaveva de andar a lavorar, e gaveva de farse la docia. Ma su moje ghe gaveva becado el posto, e la se gaveva fiondà drio la tenda, butando camisadenotecanotieracalseemudande par tera e versendo l'acqua.
L'istrian, per no perder tempo, che el tempo xe denaro, intanto el se fa la barba che tanto, tempo de farsela, forsi che la ga za finì.
Ma niente, anca regolandose cavei, basete e pei del naso, sta altra iera sempre soto co' l'acqua verta.
L'istrian, che xe regolare e calcolatore, intanto se spoiava e restava in mudande, che ancora no ghe capiti i fioi in bagno che lo vedi in desabiè. E là, in mudande col capatoio in man, el spetava, duro come un caramel.
A sentir l'acqua che cori, l'istrian ghe vigniva un fià el nervoso, e a che istrian no ghe vignissi?
Timido, el domanda: "Amor, ma ti se sta lavando i cavei forsi?"
"No, perchè?"
El pensa: "come perchè? ma mi con quel'acqua me lavavo oto volte e me vansava anche per la vanesa de radicio, ostrega!", ma sicome che nol gaveva el coragio de dirghe cussì, sempre timido el ghe fa: "No, niente, xe che son qua fora che speto, in mudande."
"Ma te sa che mi me rilaso in docia!"
"Ostia tua!" el pensa, mentre che el varda l'orologio che camina i minuti, e come che camina i minuti cussì camina l'acqua calda e de conseguensa i cubi de metano...
Finalmente, col brazo anchilosado per tignir quel mona de capatoio, dopo altri diese minuti boni a magnarse el nervoso, l'istrian podeva farse la sua docia, zercando de sparagnar usando meno acqua posibile, meno calda posibile, più veloce posibile, con meno savon posibile, per almeno refar un poco quel che la moje gaveva fraià.
Co'l vien fora, con ancora un toco de panza suto e le bole de savon soto scaio, su moje ghe fa: "Te se gaverà miga lavà tuto solo col sciampo?"
"Ma va in remengo" pensava alora l'istrian.
Va dito che la moje de l'istrian iera foresta: la vigniva infati de Trieste.